Færanlegur farsímasendir

Alþjóðlega ráðstefnan Björgun hófst í gær og lýkur í dag en þetta er í 15. sinn sem ráðstefnan er haldin. Yfir 50 fjölbreyttir fyrirlestrar verða á ráðstefnunni en um er að ræða einu ráðstefnuna á landinu sem sérstaklega er sniðin að viðbragðsaðilum.
‍

Á sýningunni verður nýr björgunarbíll Björgunarfélags Hornafjarðar til sýnis en um er að ræða stærsta björgunarbíl landsins. Hann er sérsmíði björgunarfélagsins og mun henta sérstaklega vel á hálendinu og uppi á jöklum.
‍
Bíllinn er sá fyrsti á landinu sem búinn er færanlegum farsímasendi; lausnin er þróuð af Símanum og Björgunarfélagi Hornafjarðar en með honum er tímabundið hægt að stórbæta farsímasamband þar sem lítið eða ekkert samband er til staðar.
‍
Að auki er björgunarbíllinn búinn öflugum búnaði til að ná sambandi um farsímakerfi Símans ásamt því að hægt er að nota gervitunglasamband þegar allt annað þrýtur. Þannig verður hægt að koma tímabundið á farsímasambandi þar sem ekkert samband er fyrir sem mun einfalda störf viðbragðsaðila á fáförnum stöðum, t.d. uppi á hálendi, við leit og björgun.
‍
Gísli Kristjánsson, forstöðumaður fyrirtækjalausna Símans:
„Við erum afskaplega stolt af því að geta lagt Björgunarfélagi Hornafjarðar lið og nýtt okkar þekkingu og búnað til að efla þeirra góða starf við leit og björgun. Samstarfið hefur verið gott og við óskum þeim innilega til hamingju með nýja björgunarbílinn.“