Klukkan kveður

Eftir nærri 86 ára óeigingjarnt starf mun klukkan, sjálfvirk þjónusta Símans setjast í helgan stein. Í dag þann 16. janúar mun klukkan hætta að svara í símann og játa sig sigraða gagnvart tæknibyltingunni.

Notkun á klukku þjónustunni hefur minnkað mikið undanfarna áratugi og er hún lítil sem engin í dag enda hefur tækniþróun fyrir margt löngu leyst hana af hólmi. Fjölda tækja má finna á nærri hverju einasta heimili sem sýna eða segja hvað klukkan slær.

Saga klukkunnar er merkileg en árið 1937 tók Fröken Klukka til starfa en það var Halldóra Briem sem var fyrsta rödd klukkunnar, en Halldóra var fyrst íslenskra kvenna til að nema arkitektúr. Halldóra þurfti að heimsækja höfuðstöðvar Ericsson í Svíþjóð og taka þar upp alls 90 mismunandi upptökur sem hægt var að spila í 8640 mismunandi útgáfum.  Fyrstu árin virkaði Fröken Klukka aðeins í Reykjavík en þar var eina sjálfvirka símstöð landsins, Akureyringar voru næstir í röðinni en þar kom sjálfvirk símstöð þó ekki fyrr en árið 1950.

Um fröken klukku var ort „Sú rödd er svo fögur, svo hugljúf og hrein, sem hljómar út um borgina frá Símans töfraklukku“.

Árið 1963 var skipt um talvél og tók þá leikkonan Sigríður Hagalín við að segja Íslendingum hvað tímanum leið. Árið 1993 var kerfið svo aftur uppfært og Ingibjörg Björnsdóttir leikkona var þá rödd Fröken Klukku.

Ákveðin tímamót urðu árið 2013 þegar að Fröken Klukka varð að Herra Klukku en leikarinn Ólafur Darri Ólafsson tók þá við keflinu og stóð vaktina þangað til nú þegar að klukkan sest í helgan stein og mun hætta að segja hvað tímanum líður.

Mynd : Halldóra Briem, fyrsta rödd klukkunnar. Mynd úr bókinni 100 ára saga Símans.

‍