.jpg)
Í tilefni af alþjóðlega deginum stelpur, stálp og tækni tókum við hjá Símanum á móti 200 stelpum á stálpum á aldrinum 14-15 ára í gær. Markmiðið með þessum degi er að kynna ýmsa möguleika í tæknistörfum sérstaklega fyrir stelpum og stálpum í 9. bekk grunnskóla og opna þannig augu þeirra fyrir framtíðarmöguleikum sem tæknistörf hafa uppá að bjóða, brjóta niður staðalímyndir og sýna þeim fjölbreytileikann sem einkennir tæknistörf.
Tækni-og hugverkaiðnaður hefur vaxið stöðugt undanfarin ár og er að festa sig í sessi sem fjórða stoðin í útflutningstekjum. Bæði atvinnulífið og hið opinbera keppist við að fjárfesta í stafrænum innviðum og að koma flestum sínum aðgerðum á stafrænt form enda kröfur nútímasamfélags að hægt sé að nálgast allar upplýsingar og allar helstu aðgerðir á netinu.
Fyrirtæki sem starfa í þessum geira eiga það sameiginlegt að fjárfesta mikið í rannsóknum og þróun og skapa þannig verðmæti sem sprottin eru af hugviti. Sérfræðingar sem starfa á sviði upplýsingatækni eru afar eftirsóttir starfskraftar og störfin því verðmæt. Á sama tíma nær háskólasamfélagið engan veginn að anna eftirspurn atvinnulífsins þegar kemur að störfum í upplýsingatækni.
Flest vitum við að nú þegar að fleiri konur en karlar útskrifast úr háskólanámi á ári hverju. Það sem kemur hins vegar á óvart er að þessi þróun á alls ekki við um ákveðnar greinar tengdar upplýsingatækni s.s. tölvunarfræði, hátækniverkfræði, hugbúnaðarverkfræði og rafmagnstæknifræði þar sem hlutfall kvenna er mjög lágt.
Gert er ráð fyrir að hugverkaiðnaður verði stærsta stoðin 2030 og þá er ljóst að við þurfum við á öllu okkar tæknimenntaða fólki að halda. Það hefur loðað við tæknigreinar að þetta séu karlæg störf, ekki bara á Íslandi heldur víðast hvar erlendis líka en erfitt hefur reynst að hafa áhrif á þetta hlutfall þótt það hafi markvisst verið reynt af fjölmörgum tæknifyrirtækjum.
Við hjá Símanum höfum tekið á móti ungu fólki í fjölmörg ár og kynnt tækifærin og tæknistörfin sem í boði eru en það þarf meira til. Við trúum því að það þurfi sameiginlegt samfélagslegt átak til þess að breyta þessu viðhorfi ekki ólíkt því sem á við um iðngreinar. Við höfum stigið næsta skref með því að styrkja ungar konur með framúrskarandi námsárangur til náms í tæknigreinum við Háskólann í Reykjavík og ætlum að gera það næstu árin. Markmiðið er að breyta staðalímynd tæknistarfa og fá ungar konur til að íhuga tæknigreinar sem valkost í námi og fjölga konum sem útskrifast úr tæknigreinum. Tökum höndum saman og tengjum saman stelpur, stálp og tækni!
